അവധിയില്ല; ഓഹരി വിപണി നാളെയും തുറക്കും, തുടരുമോ ബജറ്റ് ആവേശം? 2025ൽ 14 പൊതു അവധികൾ
മൂന്നാം നരേന്ദ്ര മോദി സർക്കാരിന്റെ രണ്ടാം ബജറ്റ് അവതരണദിനമായ നാളെ (ശനി) ഓഹരി വിപണി പ്രവർത്തിക്കും. പൊതുവേ ശനിയും ഞായറും വിപണിക്ക് അവധിയാണ്. എന്നാൽ, ബജറ്റ് പ്രഖ്യാപനങ്ങളോട് അന്നുതന്നെ പ്രതികരിക്കാൻ നിക്ഷേപകർക്ക് അവസരം ഉറപ്പാക്കാനാണ് എൻഎസ്ഇയും ബിഎസ്ഇയും നാളത്തെ അവധി ഒഴിവാക്കിയത്. മുമ്പ് ബജറ്റ് അവതരിപ്പിക്കപ്പെട്ട ശനിയാഴ്ചകളായ 2015 ഫെബ്രുവരി 28, 2020 ഫെബ്രുവരി ഒന്ന് തീയതികളിലും ഓഹരി വിപണികൾ പ്രവർത്തിച്ചിരുന്നു. പൊതുവേ ബജറ്റിൽ കൂടുതൽ ഊന്നലുണ്ടാകുക അടിസ്ഥാന സൗകര്യവികസനം, ബാങ്കിങ്, മാനുഫാക്ചറിങ്, ആരോഗ്യ സേവനമേഖലകൾക്കായിരിക്കും. നികുതി, വിവിധ മേഖലകൾക്കായുള്ള നയങ്ങൾ, ഫണ്ട് വകയിരുത്തലുകൾ എന്നിവ സംബന്ധിച്ച പ്രഖ്യാപനങ്ങളുമുണ്ടാകും. ഇവയോടെല്ലാം അന്നുതന്നെ പ്രതികരിക്കാൻ വിപണി പ്രവർത്തിക്കുന്നതുവഴി നിക്ഷേപകർക്ക് കഴിയും. തുടർന്നുള്ള ദിവസങ്ങളിലേക്കുള്ള വിപണിയുടെ ട്രെൻഡും അതുവഴി അറിയാം. തുടർച്ചയായ 8-ാം ബജറ്റ് അവതരണത്തിനാണ് ധനമന്ത്രി നിർമല സീതാരാമൻ ഒരുങ്ങുന്നത്. ഇത് റെക്കോർഡുമാണ്.ഇന്ത്യൻ ഓഹരി വിപണികൾക്ക് 2024ൽ 16 പൊതു അവധി ദിനങ്ങളാണുണ്ടായിരുന്നതെങ്കിൽ 2025ലുള്ളത് 14 ദിനങ്ങൾ. ഫെബ്രുവരി 26ന് (ബുധൻ) മഹാശിവരാത്രി അവധി. മാർച്ച് 14ന് (വെള്ളി) ഹോളി. മാർച്ച് 31ന് (തിങ്കൾ) റംസാൻ. ഏപ്രിലിൽ 3 പൊതു അവധികളുണ്ട്. 10ന് (വ്യാഴം) മഹാവീര ജയന്തി, 14ന് (തിങ്കൾ) ഡോ. അംബേദ്കർ ജയന്തി, 18ന് (വെള്ളി) ദുഃഖ വെള്ളിയും. മേയ് ഒന്നിന് (വ്യാഴം) മഹാരാഷ്ട്ര ദിന അവധി. ഓഗസ്റ്റ് 15ന് (വെള്ളി) സ്വതന്ത്ര്യദിന അവധി. ഓഗസ്റ്റ് 27ന് (ബുധൻ) വിനായക ചതുർഥിക്കും അവധിയാണ്. ഗാന്ധി ജയന്തിയും ദസറയും പ്രമാണിച്ചാണ് ഒക്ടോബർ രണ്ടിന്റെ (വ്യാഴം) അവധി. കൂടുതൽ ബിസിനസ് വാർത്തകൾക്ക്: manoramaonline.com/business
Source link
