കൂട്ടക്കുതിപ്പ്: ഓഹരി, സ്വർണം, രൂപ മുന്നേറുന്നത് എന്തുകൊണ്ട്? ഷിപ്പിങ് ഓഹരികൾക്കും കനത്ത പ്രിയം

കൊച്ചി ∙ യുഎസിലെ കേന്ദ്ര ബാങ്കായ ഫെഡറൽ റിസർവ് ഈ വർഷം രണ്ടു തവണ പലിശ നിരക്കു കുറയ്ക്കാനുള്ള സാധ്യത തെളിഞ്ഞ സാഹചര്യത്തിൽ ഓഹരി വിപണിയിൽ കൂട്ടക്കുതിപ്പ്; സ്വർണ വിലയിൽ വീണ്ടും റെക്കോർഡ്; കറൻസി വിപണിയിൽ രൂപയ്ക്കു കൂടുതൽ കരുത്ത്. നിരക്കു നിർണയ സമിതി യോഗം പലിശ നിരക്കിൽ നിലവിലെ സ്ഥിതി തുടരാനാണു തീരുമാനിച്ചതെങ്കിലും വർഷാവസാനത്തോടെ ഇളവുകൾ സാധ്യമായേക്കുമെന്നു ഫെഡ് റിസർവ് പ്രസിഡന്റ് തലവൻ ജറോം പവലാണു പിന്നീടു സൂചിപ്പിച്ചത്.സെൻസെക്സ് ഒരു ഘട്ടത്തിൽ 1,000 പോയിന്റിനു മുകളിലേക്ക് എത്തിയെങ്കിലും ലാഭമെടുപ്പിന്റെ ഫലമായി വ്യാപാരാവസാനത്തോടെ നേട്ടം 899.01 പോയിന്റിൽ ഒതുങ്ങി. സെൻസെക്സ് അവസാനിച്ചത് 76,348.06 പോയിന്റിലാണ്. നിഫ്റ്റി 283.05 പോയിന്റ് ഉയർന്ന് 23,190.65 നിലവാരത്തിലാണു ക്ലോസ് ചെയ്തത്. നാലു ദിവസത്തെ തുടർച്ചയായ കുതിപ്പ് ഓഹരി നിക്ഷേപകരുടെ ആസ്തി മൂല്യത്തിൽ 17.45 ലക്ഷം കോടി രൂപയുടെ വർധനയ്ക്കു സഹായകമായിട്ടുണ്ട്.കരുത്തോടെ രൂപ സാമ്പത്തിക വർഷത്തിന്റെ അവസാനമായതിനാൽ വിദേശ ബാങ്കുകളും കയറ്റുമതി വ്യാപാരികളും ഡോളർ വിൽപന വർധിപ്പിച്ചിട്ടുണ്ട്. ഇതും രൂപയ്ക്കു നേട്ടം സമ്മാനിക്കാൻ ഇടയാക്കിയതായി വിദേശനാണ്യ വിപണിയുമായി ബന്ധപ്പെട്ടവർ  പറഞ്ഞു.


Source link