സുൽത്താൻബത്തേരി: സംസ്ഥാനാതിർത്തിയായ മുത്തങ്ങയിൽ ചെക്പോസ്റ്റിലൂടെ ലോറിയിൽ കടത്താൻ ശ്രമിച്ച 3495 കിലോഗ്രാം നിരോധിത പുകയില ഉത്പന്നങ്ങൾ എക്സൈസ് പിടികൂടി. മുൻപ് ഒരുകിലോയിലേറെ കഞ്ചാവുമായി പിടിയിലായിട്ടുള്ള മാനന്തവാടി വാളാട് നൊട്ടൻ സഫീറി(36)നെ പിന്നീട് പോലീസ് അറസ്റ്റുചെയ്തു. വ്യാഴാഴ്ച രാത്രി പതിവുപരിശോധനയ്ക്കിടെയാണ് കർണാടകയിൽനിന്ന് ലോറിയെത്തിയത്. കാലിത്തീറ്റയാണെന്നു പറഞ്ഞതിൽ സംശയംതോന്നിയ എക്സൈസ് പുറമേയുള്ള ചാക്കുകൾ മാറ്റി പരിശോധിച്ചപ്പോഴാണ് നിരോധിത ഉത്പന്നങ്ങൾ കണ്ടെത്തിയത്.ലോഡിന് പുറംഭാഗങ്ങളിൽ 40 ചാക്ക് ബിയർ വേസ്റ്റ് അടുക്കിയതിനുള്ളിലാണ് പുകയില ഉത്പന്നങ്ങളുടെ ചാക്കുകളുണ്ടായിരുന്നത്. 15 കിലോഗ്രാം വരുന്ന 133 പ്ലാസ്റ്റിക് ചാക്കുകളിലും 30 കിലോഗ്രാം വരുന്ന 50 ചണച്ചാക്കുകളിലുമായാണ് നിരോധിത ഉത്പന്നങ്ങൾ ഒളിപ്പിച്ചിരുന്നത്. പുറത്തുനിന്ന് പെട്ടെന്ന് കണ്ടുപിടിക്കാൻ പറ്റാത്ത നിലയിലായിരുന്നു ഇവ. സഫീറാണ് ലോറി ഓടിച്ചുവന്നത്.
Source link
