ഹെക്ടറിൽനിന്ന് വർഷം 250 ടൺ പച്ചപ്പുല്ല്‌; പുതിയ തീറ്റപുല്ലിനം വികസിപ്പിച്ചെടുത്ത് കാർഷിക സർവകലാശാല
പുതിയ തീറ്റപുല്ലിനം വികസിപ്പിച്ചെടുത്ത് കേരള കാർഷിക സർവകലാശാല. കെഎയു സുവർണ എന്ന് പേര് നൽകിയിരിക്കുന്ന തീറ്റപുല്ലിനം, സർവകലാശാലയിൽ വികസിപ്പിച്ചെടുത്ത നാലാമത്തെ ഗിനി പുല്ലിനമാണ്. ഗിനി പുല്ല് അഥവാ കുതിരപ്പുല്ല് (ശാസ്ത്രീയ നാമം: മെഗാതൈറസ് മാക്‌സിമസ്) ചോയേസീ കുടുംബത്തിൽപ്പെട്ട ദീർഘകാല കാലിത്തീറ്റവിളയാണ്. ഉയർന്ന ഇല-തണ്ട് അനുപാതവും ഉത്‌പാദനക്ഷമതയുമുള്ള ഗിനി പുല്ല് തണലിൽ നന്നായി വളരുമെന്നതിനാൽ, തെങ്ങിൻതോപ്പിൽ ഇടവിളയായി കൃഷിചെയ്യാൻ അനുയോജ്യമായ കാലിത്തീറ്റവിളയാണ്.നേരത്തേ പുറത്തിറക്കിയ ഹരിത, മരതകം, ഹരിതശ്രീ എന്നീ ഇനങ്ങളെക്കാളും ഇരട്ടിയിലേറെ വിളവുതരുന്ന ഇനമാണ് കെഎയു സുവർണ. വർഷം ഒരു ഹെക്ടറിൽനിന്ന് 250-290 ടൺ പച്ചപ്പുല്ല്‌ ലഭിക്കും. ഇതിൽ 13.5 ശതമാനം മാംസ്യവും 22 ശതമാനം നാരും അടങ്ങിയിരിക്കുന്നു. ഓക്‌സലേറ്റിന്റെ അളവ് സുരക്ഷിതമായ തോതിനുള്ളിലേയുള്ളൂ. മറ്റിനങ്ങളെ അപേക്ഷിച്ച് കുറഞ്ഞ അളവിൽമാത്രം ഗിബ്ബറിലിക് ആസിഡ് ഉള്ളതിനാൽ സുവർണയിൽ പൂവിടൽ വളരെ കുറവാണ്.
Source link
