വണ്ണപ്പുറം(ഇടുക്കി): എസ്എസ്എല്‍സി പരീക്ഷയില്‍ എല്ലാ വിഷയങ്ങള്‍ക്കും എ പ്ലസ് നേടിയ വണ്ണപ്പുറം പാറയ്ക്കല്‍ അമ്മുവിന്റെ വിജയത്തിന് തിളക്കമേറെ. രാവിലെ അഞ്ചരയ്ക്ക്, പത്രം വിതരണം ചെയ്തുകൊണ്ടാണ് ഈ കുട്ടിയുടെ ദിവസം തുടങ്ങുന്നത്. അത് ഏഴിന് കഴിയും. തുടര്‍ന്നാണ് സ്‌കൂളില്‍ പോയിരുന്നത്. അമ്മുവിന് ഇത് വെറും ജോലിയല്ല. പത്രവായനയോടുള്ള കമ്പവും, ചെറിയ വരുമാനം നേടി, കൂലിപ്പണിക്കാരായ അച്ഛനും അമ്മയ്ക്കും തുണയാകണമെന്ന ആഗ്രഹവുമാണ് ഈ തൊഴില്‍ തിരഞ്ഞെടുക്കാന്‍ കാരണമെന്ന് അമ്മു പറഞ്ഞു.വണ്ണപ്പുറം എസ്എന്‍എംവിഎച്ച് എസ് എസിലായിരുന്നു പഠനം. കൂവപ്പുറം പ്ലാന്റേഷന്‍ കവലയിലാണ് പത്രം വിതരണംചെയ്യുന്നത്. പകുതിയിലേറെയും മാതൃഭൂമിയാണ്. തിരികെ വിട്ടിലെത്തി ഭക്ഷണവും കഴിച്ച് സ്‌കൂളിലേക്ക് പോകും. വൈകീട്ടാണ് പഠനം. രാത്രി പത്തുവരെ പഠിക്കും.
Source link
